國民義務教育無應該排除構成國民人口主要族群ê母語教育，這是納稅人ê權利。台灣講台語做母語，講客語做母語，講原住民語做母語ê人口加起來占台灣人口ê85%。結果in ê 母語教育tī國中課綱予人排除，這是oh-tit予人理解ê代誌。
聯合國教科文組織（UNESCO）tī 1951年發函予會員國，要求各國ê國民教育應該用母語來實施教育，按呢才有法度kā彼个族群ê文化保存落來，傳承落去。同時，嘛才有法度予囡仔ê潛能完全發揮出來。2001年2月21日UNESCO tī世界母語日公告全世界瀕臨死亡ê語言，特別指出台灣原有24種語言，現今只存12種，其中除了華語，其他ê語言攏有可能會tī 21世紀末消失。
多語言多文化是台灣ê特色，台灣ê國民教育應該呈現這个特色，這是台灣真重要ê資產，嘛是當今世界ê主流思潮，台灣不應該家己放棄多樣語言文化ê特色，自外tī這个世界潮流。
國民黨政權欲講伊毋是殖民政權，就無應該保留殖民ê語言政策。全世界攏認同殖民時代已經過去，殖民ê語言政策，是落伍、無文明、野蠻ê語言屠殺政策。台灣無應該繼續日本殖民時期留落來ê「國語」語言政策，只是kā「日語」國語，改做「華語」國語。殖民語言政策ê本質猶毋肯改變。一方面欲宣稱伊毋是殖民政權，一方面koh欲繼續保留殖民語言政策，按呢敢無矛盾？21世紀猶有「國語」，應該是見笑代。以前tī咱將國小課綱內底ê「國語」改做「華語」，還這个語言伊本來ê正名，嘛予國民黨政府有洗清殖民政權罪名ê機會，結果國民黨一提著政權，馬上kā「華語」改轉來「國語」，恢復伊殖民政權ê真面目。
國中應該kā台灣人ê本土母語列為必修，若無，自2001年實施ê國小母語教育，袂當延續落去，變成國家真大ê浪費。囡仔ê母語學習應該持續、有連貫性，無應該到國中階段就斷去。台灣ê政府應該為人類保存人類tī台灣ê語言資產，這是權利，嘛是義務！