鬼仔火（kuí-á-hué）

五月尾ê天氣是tī春天欲進入去熱天（jua̍h-thinn）的氣候。天氣是袂熱也袂寒，日子又閣長。庄裡細漢gín-á這時陣尚歡喜！大家食暗頓（àm-tǹg）了後猶閣有（iah-koh-ū）二點外鐘ê時間會當（ē-tàng）置外口活動。規陣走相逐（tsáu-sio-jiok 註1）ê gín-á置埕頭埕尾厝前厝後傱（tsông 快跑）來傱去。抑覕相揣（bih-sio-tshuē註2）的gín-á-tīn置柴墩,稻草墩各地覕出覕入。

庄外稻仔田（tiū-á-tshân）的稻欉（tiū-tsâng註3）也濟濟少少（tsē-tsē-tsió-tsió）開始逮發花（tē-huat-hue註4）。田底ê田蛙仔（tshân-op-á註5）佇天一下暗（thinn-tsı̍t-e-àm註6）就--op--op叫，逮求偶（tē-kiû-ngóo）。這時遠遠（hn̄g-hn̄g）ê田裡閃出（siám-tshut）一葩火（tsı̍t-pha-hué），置煙霧中予風吹kah若化若爍（ná-hua-ná-sih註7）搖來搖去。一身若像稻草人ê烏影置火ê面前（bīn-tsîng）遐裡動一下動一下（tāng-tsı̍t-ē）。逮蹉跎（tē-tshi-tô註8）的大漢gín-á看著就手指（tshiú-kí註9）遠遠彼葩火，喙講：「鬼仔火！鬼仔火！」做伙滾絞ê細漢gín-á聼着都驚kah哀哀叫。規陣傱傱轉去家己厝內揣父母去kā跤腿頭（kha-thuí-thâu）攬咧（lám-leh抱著）嗎嗎哮（má-má-hau註10）。坐tuà埕頭抐涼（lā-liâng註11）噗薰（pok-hun註12）的老大人看着就講：「水祥仔閣逮釣水雞（註13）也！」

水祥仔穡地（sit-tè）作無濟。平常時靠替人做寡粗重工課：親像犂田，播田（pòo-tshân插秧），挲草（so-tsháu）佮割稻ê工錢來補貼家庭收入。同時也揣寡季節性ê副業趁三兩个仔錢好做家己檳榔薰酒ê所費：春天尾是釣水雞。熱天田溝仔水滿滿ê時落去電魚kah蝦。抑置秋天尾稻仔穗逮欲飽米（tē-beh-pá-bí註14）的時陣，水利局將灌溉ê水溝水停止排放（pâi-hòng）。這時水祥仔到各水門下（tsuí-mn̂g-hā）ê水沖窟（tsuí-tshiâng-khut）摸蜊仔兼洗褲（bong-lâ-á-kiam-sé-khòo）。

在五月初水祥仔已經將釣水雞ê家私工具詮便便（tshuân-piān-piān註15）。一支鐵罐仔電土燈鬥置三尺長ê竹管仔頂。一茭竹篾仔（tsı̍t-kha-tik-bı̍h-á）編ê水雞籠（lam）仔，深深ê竹籠頂面開一个半尺闊ê喙。一枝四尺長ê竹箠仔（tik-tshê-á）尖尾縛一條三尺外長ê釣魚線，佮一殼土蚓（tsı̍t-khok-tōo-kún註16）。春天尾濕氣大，暗來田裡會罩霧（tà-bū）襲雨微仔（sip-hōo-bui-á註17）。

水祥仔暗頓食飽後，天欲暗時就家私款款咧khuán-khuán-leh註18），身穿一領棕蓑好遮雨水，頭戴一頂竹瓜笠仔向庄外田中央（tshân-tiong-ng）行去。這時田底ê田蛙仔都已經大隻也，對田頭行去就聼着公ê田蛙仔--op--op叫逮求偶。水祥仔揣一位田蛙仔叫kah尚鬧ê田頭將彼支電土火竹管插置田岸邊。伊將電土鐵罐仔倒入去一屑仔水，然後趕緊加罐窒仔（kuàn-that-á）封絚（hong-ân註19）。罐內ê電土透着水就--tshi--tshi 叫起化學作用產生沼氣甲烷（tsiáu-khì-kah-uân）。這時撇（phiat擦）一支番仔火（huan-á-hué註20）將電土火燈心點着（tiám-tioh），一葩電土火就蹛遐裡爍一下爍一下。田底ê田蛙仔予火光喢（sannh註21）咧就跳倚近來火把下（hā）。水祥仔kā縛置釣線ê土蚓塵落（tîn-loh註22）田土面。伊kā竹箠仔上下（siōng-hā）抽一下抽一下（thiu-tsı̍t-ē）。田蛙仔就跳倚來喙擘開（peh-khui）kā土蚓欱（hop註23）咧。伊趕緊將倒手提ê水雞籠仔伸出去，正手將竹箠抽懸共一隻田蛙仔墜落（tuī-loh）入籠仔內。然後緊緊kā竹箠仔抽振兩三下，彼隻田蛙仔喙一下peh開規隻就落落（lak--lo̍h）籠仔底。如此ê重覆將土蚓塵落田土面，上下抽動竹箠，田蛙仔上釣，入籠。一分鐘內會當釣着三四隻田蛙仔。經過十幾分鐘後欲食釣（beh-tsia̍h-tiò註24）ê田蛙仔也攏入籠也，電土火也差不多欲化也（beh-hua-ā註25）。伊就家私收收咧行去別个田蛙仔聲鬧熱ê田頭㸃火下釣。

水祥仔置伊厝埕尾挖一个半身深ê土窟好放釣轉來ê田蛙仔。窟頂嵌甘蔗葉鉼（phiánn）好遮風雨。窟底是跤頭窩仔深（kha-thâu-o-á-tshim註26）的水予田蛙仔泅（siû）。同時外面蠓蟲會來水中放卵生蛆（tshi註27）好做飼料予田蛙仔食。伊每三五工就將窟底ê大隻田蛙仔掠起來裝置水雞籠載去西螺賣予菜市仔邊ê糋寬焍（tsìnn-khuann-te 28）食攤。刣清氣ê田蛙仔合（kah）一片九層塔搵米漿落去油鼎糋（tsìnn炸）kah酥酥起來搵辣椒Tho-Ma-To醬是這時陣ê生臊（tshenn-tshau）美食。一般ê庄跤農民是食袂到的（tsia̍h-bē-tò-ê註29）。庄跤人愛食田蛙仔就要家己欱（ka-kī-hop）。

註：1.互相追逐之遊戲；2.躲迷藏；3.稻稞；4.在開花；5.鄉下人叫青蛙為田蛙仔；6.天一暗下來；7.時暗時明；8.在遊玩；9.用手指頭指向某方向；10.大聲唉嚎；11.撐涼；12.將香煙氣自胸中吐出；13.鄉下人管「釣青蛙」叫做「釣水鷄」）；14.快要飽滿；15.準備齊全；16.一盒蚯蚓；17.微微細雨來侵襲；18.整理就緒；19.關緊；20.西洋人引入的點火用火柴支；21.吸引住；22.往下放；23.以口含物；24.要上鈎；25.快要熄火；26.腳跟那麼深；27.蚊卵孵化出的幼蟲；28.炸酥的米漿殼內包肉,蝦,菜類；29.花不起錢買來吃的。