(地理) 太平洋西南海邊，（環境）美麗島台灣翠青。
(歷史) 早前受外邦統治，（建國）建國今在出頭天。
(憲法) 共和國憲法的基礎，(國民) 四族群平等相協助。
(國際) 人類文化世界和平，(角色) 國民向前貢獻才能。
兼有古典之雅緻kap民謠之大眾化而廣受認同ê詩歌〈台灣翠青〉作詞者，92高齡ê鄭兒玉牧師（1922.06.27 - 2014.12.11）tī九合一大選後ê年尾，於他所疼ê學生籌備聖誕聚餐之時，tī台南ê居家安息主懷。他服務54年ê長老教會為他tī台南神學院安排舉行告別感恩禮拜，母語運動ê後進積極準備為他編輯紀念刊物。
〈台灣翠青〉除了「有世界觀」（1988 International Poetry Contest評審出版人賞之評語），tī描寫台灣ê地理、歷史、特色以及理想（共和國憲法、族群平等相協助），成做地球村一份子ê責任（人類文化世界和平）各方面攏有周全ê意義。短短數句m̄-nā寫出作者對國家ê理想，koh指出台灣國家理念ê世界使命。Án-ne ê一首詩，作者到底是啥麼人neh？
鄭牧師出世tī日本時代ê屏東東港，老父經營製米廠，對詩詞韻律真有興趣。送他來讀台南長老教中學（長榮中學），後來去日本同志社中學，tī-hia信耶穌，受著教會詩歌的影響。他tī同志社大學文學部研究神學，特別興趣基督教歷史kap西洋近代史。1947正月學成回台，kap他無熟識ê阮朝日先生聽講有留日青年轉來，tiau-kang去基隆碼頭迎接他。因為離開厝真久他先轉去東港，想bē到hō͘重病ê老父染著天花，卻也因為需要靜養逃過228 ê劫難。
1949他受教會差派tī嘉義布袋沿海開拓傳道，兼任母校長中教師。1955到芝加哥大學McCormick神學院研讀碩士學位，了後koh前往瑞士日內瓦大學普世教會研究所進修，回國後受聘tī台南神學院。1963鄭牧師受請為西德文化部部賓，參與研究德國ê社會kap教會關係。1966 koh受請為以色列宗教部部賓。由chiah-ê國際文化kap宗教ê事務參與經驗，他tī台南神學院創設了基督教社會互談會（Christion Academy, 1967），koh舉辦信徒事工班、工業社會服務、家庭協談中心，tī高雄市首創生命線(1969)等等。
此時國民黨政權開始壓迫長老教會退出普世教會聯盟(World Council of Churches, WCC)，教會開始抵抗。1971 ROC tī聯合國被PRC取代，尼克森總統訪問北京前，由鄭牧師起底稿長老教會發表了「國是聲明」，主張台灣人民對台灣前途有自決權。隔冬鄭牧師赴德國tī漢堡大學神學院作研究，1975去美國參加台灣人夏令會，發表他所寫ê長篇敘事詩，開啟了後來創作〈台灣翠青〉ê契機。1977美國宣布One China Policy，鄭牧師再度為長老教會＜人權宣言＞擬底稿，“促請政府採取有效措施，使台灣成為一個新而獨立ê國家”。 因為長老教會以及旅美台人不斷ê努力，美國國會制定通過了「台灣關係法」。
1979中美建交，台灣人心慌亂。因應時局ê變化神學院設立附屬「基督教社會研究所」，鄭牧師擔任所長，仝時tī長老教會信仰與教制委員會主委任內(1978-85)亦開始研擬長老教會「信仰告白」。這冬年底就發生高雄美麗島事件，教會有關人士多位受牽連。隔冬2月28 林宅血案發生，4月總幹事高俊明牧師被抓。Koh隔冬陳文成事件發生，鄭牧師等教會人士冒著生命危險牧會關懷遺族。
1980年前後鄭牧師出任「教會公報」社論主筆kap理事長，教會公報擴大成做“台灣教會kap台灣社會”ê公報，扮演著「時代ê米該亞」角色（舊約聖經先知米該亞tī極權政治下，受特務人員ê恐嚇，卻根據信仰良心，以上帝ê公義警醒社會，宣揚彌賽亞拯救ê福音)。公報社1983遷建新大樓tī現址。
直到戒嚴令解除(1987)，李登輝就任總統(1988)，第一屆國代(1948)全部退職(1991)象徵極權時代ê結束，各族群ê民主人權運動lú來lú明顯。鄭牧師開始思考：台灣beh建立啥麼款ê新國家？國家ê理想何在？
1994他tī台南神學院開設「台語文化教室」，全力推動台灣母語文化建設，督促母語教育正式進入教育體制。2001台灣羅馬字協會成立，後繼有人。2002他正式二度退休，出版了《押韻詩篇》與《台灣翠青》兩本冊。Iû-goân持續主持著台灣戰後威權時期ê文獻整理，關懷時勢，積極參與台灣母語各種運動。
這位被稱做siōng有台灣意識ê牧師、教授、詩人、時事評論家、母語運動者。因為他對人民土地ê愛kap獻身，tī宣教、教育、民主運動、社會關懷kap研究ê成就，以及各方面傑出ê表現，1982年就已經被日本列入「世界基督教名人辭典」（東京出版），1987年koh被列入美國傳記研究所編輯ê「世界5千名傑出人物」（Five Thousand Personalities of the World）。亦常常受邀請tī國內外(日本、美國、德國、瑞士...等)教會、大學講座或專題演講。2009得著教育部「推展本土語言貢獻獎」。
他常常khǹg-tī嘴邊ê「人生是意義，不是享受。」其內涵是：無條件服務別人，甚至十字架ê報酬亦甘願接受。這是恩典，是tī逆理中所得ê真理(Grace given in the paradoxical truth)。他ê一生就親像聖經所講「我已經爭戰好ê爭戰，已經盡跑走ê路站，已經守所信ê道理。」
《台語文運動訪談暨史料彙編》(國史館, 2008)關於他ê專訪〈我有母語，故我自主〉寫著：「我一生ê願望亦可講是我ê遺言，就是：
希望有一日台灣人能以他們不同ê族群母語思考
創出獨一無二ê（unique），並受上帝祝福之世界性台灣國文化。」
時代ê米該亞留落他美好ê腳跡，予咱思念不止。咱著繼續吟唱〈台灣翠青〉直到建立理想的台灣國家。第二節歌詞是教會詩歌。
(創造) 最源頭上帝創造，(麗島) 美麗島台灣最好。
(子民) 賞賜給祖先居起，(建國) 建國今上主攝理。
(基督) 主基督國家的君王，(寄望) 理想邦目標的寄望。
(建設) 咱要建設仁愛公義，(如天) 祖國滿地親像在天。