捌聽人講:「母語就是阿母的話」。咱共看，現此時對外國嫁來台灣做新婦的「阿母」，有影是濟甲若沙螺仔殼咧。若照這款講法，五花十色的母語是欲按怎佇學校教？母語確實是無需要佇學校教！嘛無才調教！遮的「新臺灣之子」佇學校學北京語、英語，佇厝裡講in阿母的母語，佮「臺灣」有啥物關係？一點仔關係都無。若有，就是父母趁食三頓的所在爾爾。是講，遮些娶外籍新娘，佇台灣徛起的台灣查甫人，啊是欲算啥？
我的父母以早為著欲趁錢予阮接受好的教育，in逐工七早八早去做公田，轉來，就閣趕去做會社的工課。放我這个五、六歲囡仔咧照顧兩个小弟，夯椅頭仔跂跤(ké kha)款中晝頓……。毋管人按怎恥笑，阿爸攏恬恬仔忍受，做伊認為有價值的代誌。我定定咧想，是按怎咱佇臺灣這塊土地徛起的人，毋免予伊的序細踮學校學家己的父母話，就是「正港」母親台灣的話咧？
母語敢有需要佇學校教？當然嘛有需要！
咱人自出世就開始模仿父母、親情朋友、厝邊頭尾的對話，學會曉聽佮講的能力。特別是佇工商發達的現代社會，父母和序大人大多數已經無法度親像較早仝款，用真濟時間來陪伴、教咱的囡仔學母語；閣進一步來講，若無透過學校有系統的教育，咱只是一陣毋捌字的青盲牛爾爾。因為無文字紀錄，咱的語言、文化真緊就會走精、失傳去，甚至分袂清楚「有心」、「有身」，「感恩」、『肛溫』有啥物無仝，烏白濫濫做伙。所以，需要透過學校教育，一步一步，照紀綱來，予咱的囝孫認捌台灣的文字，用咱的台語文紀錄這塊土地的大細項代誌，用媠氣的台灣話寫出在地的文化，優雅的文學，一代一代傳承落去；甚至傳送對國外去，予全世界的人攏有機會了解「台灣」，欣賞台灣的媠。
講起來真好笑，佇台灣有超過七成的人口講台語，逐家煞綿綿爭爭送囡仔去補英語、華語，講佇學校教母語，會影響囡仔學外語的能力，真正是怪奇呢!敢講學台灣話就會袂記得英語、華語?哪按呢，學拍乒乓是毋是就會袂記欲按怎拍排球、籃球矣?
一个人，若無認同家己的家庭，佇社會上往往嘛無法度徛起。仝款的道理，咱台灣人若看袂起家己的語言、文化，毋管咱去到佗位，別人嘛一定袂尊重咱。所以，請寶惜咱祖先留落來的文化資產，逐家做伙來推捒母語，毋通變成浮根的水薸，才來後悔，就已經袂赴矣！