自2017年6月23日客委會所屬「講客廣播電台」開播以來，有幾種現象分人愁慮：一種係節目中從頭到尾主持人無講客話；一種係主持人講客語同華語各佔一半；另外就係主持人講華語為主，客語正一息半息！這兜現象確實分堅持講客个客家聽眾當大个反感。本來「講客廣播電台」成立个目的，就係愛成為客家話空中交流个平台，擔負客語傳承、文化分享个使命，就係愛用客家話做廣播，來傳承客家話，傳播客家文化。
對主持人來講，應該了解「講客廣播電台」開播个精神同目的！毋過，做麼个有兜主持人無堅持對頭到尾講客話？一種可能就係，主持人講客話个能力無當好，有兜現代生活新出現个詞彙、專業个詞彙，毋曉得翻譯或者無自信用客話來講；還有一種就係，主持人面對毋曉得講客个來賓，淨做得用「大家」都溝通得个華語來訪問、交談，主持人再帶兜仔客家話來完成一齣節目；另外一種就係主持人假設，佢个節目聽眾毋係淨會講客个朋友，故所無堅持全程用客話來做節目。
假使主持人个客話能力毋好，本成就應該加強、提升自家客話个能力，無成，一個「講客廣播電台」分人聽著無講客或者聽毋著客家話，該係當分人愐毋解个現象！愛仰般提昇自家个客話能力？就係為自家營造聽客話、講客話个生活環境，同相識个客家朋友用客話交談、聽看恁多个客家電台、客家電視台、網路媒體个影音、客語能力認證个語料這兜，都係做得提昇自家个講客能力，當然，在自家个節目中煞猛講客也係當好个學習。在觀念上，客話个能力毋單止聽同講，閱讀、寫作客語文章也係客語能力。
假使主持人毋曉得或者無自信，仰般同現代生活新出現个詞彙或者專業詞彙，翻做客家話，這種情況，愛仰結煞？客委會或者教育部有必要組織相關委員會，針對現代生活中新出現个詞彙、各種專業詞彙來做客語翻譯个工作，同佢公布出來分大家參考、使用。在客人客話行入現代生活个過程中，這種翻譯个工作有其必要性同重要性。在這之前，主持人還係做得參考音譯或者意譯个方式，同新出現个、專業个詞彙翻譯做客話。
來賓个邀請係主持人安排个。主持人有必要同來賓講清楚節目个性質，這係「講客廣播電台」个節目，假使來賓毋曉得講客，主持人在訪問時節定著愛同訪談个問題、還有來賓个回答用客家話來同聽眾講過！就算來賓毋會講客，節目中至少有一半个時間聽得著主持人个客話。當然，係講來賓係客家人，就愛請來賓盡量用客話來講，該從頭到尾用客話來講，分聽眾聽著个全係客話，就毋係麼个難事哩喲！
「聽眾朋友無見佢全部聽得識客，故所無愛全程用客來講，恁仰正有法度同主持人愛傳播个內容，分大家了解！」假使這係主持人个假設，該就像在公共个場所，有人聽毋識客話就無愛用客話來講，愛用大家聽得識个話來講，該客話永久就毋使在公共場所發聲，客話之中更加弱勢个客話，更加無話講！該係照恁樣个思路，「講客廣播電台」也毋使講客，因為聽眾裡肚定著有人聽毋識客話！假使愛分毋曉聽客人聽得識，一句客話一句華語抑係holo台語乜係變通个方法。
「講客廣播電台」係客家話空中交流个平台，就係愛用客家話做廣播，來傳承客家話，傳播客家文化，這正係電台成立主要个精神同目的，希望這兜想法，做得提供電台，解決「該講客毋講客」个現象个參考。
論壇屬作者個人意見，文責歸屬作者，本報提供意見交流平台，不代表本報立場。